Safnar fyrir frænku sína - Sárt að lesa hvað skrifað er um þær

„Ég hugsa til hennar á hverjum degi og ég fæ send bréf frá henni reglulega og áttaði mig á því að hún þyrfti aðstoð,“ segir Emilíana Bened Andrésardóttir, 17 ára stúlka sem hóf söfnun fyrir 19 ára frænku sína, Aðalsteinu Kjartansdóttur, sem var dæmd í 7 ára fangelsi í Tékklandi í nóvember á síðasta ári.

Aðalsteina og önnur stúlka voru handteknar í nóvember 2012 á alþjóðaflugvellinum í Prag í Tékkandi með þrjú kíló af kókaíni á sér. Þegar dómurinn yfir þeim féll ári síðar var hann þeim mikið áfall. Stúlkurnar brotnuðu niður þegar dómurinn var lesinn upp. „Ég gæti bara dáið,“ sagði Þórir Gunnarsson, ræðismaður Íslands í Prag að stúlkurnar hefðu sagt. Í viðtali hjá DV sagði Aðalsteina að dómurinn hefði verið sér mikið áfall og hann hefði verið mun þyngri en búist hafði verið við.

„Það er sárt að lesa hvað er sagt um þær í kommenta-kerfinu,“ segir Emilíana. „Þær eru bara ungar stelpur sem lentu í vandræðum og fá síðan svona þunga dóma, auðvitað er það áfall.“

Gott að vita fólk vill styðja hana

Aðalsteina þarf að sjá fyrir sér sjálf á meðan á fangelsisvistinni stendur og þarf að útvega sér allar helstu hreinlætisvörur eins og klósettpappír sjálf. Hún þarf einnig að sjá sér sjálf fyrir mat og öðru því sem flestum þykir sjálfsagt að eiga og hafa aðgang að sögn Emilíönu.



Þó nokkrir hafa lagt söfnuninni lið og Emilíana er mjög ánægð með það. Fyrir utan hvað hversu mikilvægt það sé að Aðalsteina geti útvegað sér allar nauðsynjavörur þá sé gott fyrir hana og fjölskylduna að finna að það er fólk sem styður hana og dæmir hana ekki.

Ykkur væri ekki sama ef þetta væri frænka ykkar

„Mér finnst svo ljótt hvernig talað er um þessar stelpur í samfélaginu,“ segir Emilíana.

Á Facebook síðu sína skrifaði Emilíana: „Ég vil reyna hjálpa fallegu stelpunni minni að hafa það sem bærilegast þarna úti og hægt er. Ég gæti ekki hugsað mér að lenda í þessum aðstæðum núna eftir nokkra mánuði og efast um að einhver geti það. Áður en þið dæmið hana, þá vona ég þið hugsið ykkur tvisvar um því ef hún væri dóttir ykkar, systir ykkar, barnabarnið ykkar, frænka ykkar eða vinkona þá væri ykkur ekki sama.“

Þeir sem vilja leggja þeim frænkum lið er bent á reikninginn: 115-26-30089, kennitala: 300894-2089.