Hendur stjórnmálamanna bundnar í Sotsjí

Dmitry Kozak, aðstoðarforsætisráðherra Rússlands, varaði í dag íþróttamenn sem og áhorfendur sérstaklega við því að vekja athygli á réttindum og málefnum samkynhneigðra meðan á Vetrarólympíuleikunum í Sotsjí stendur. Þetta kemur meðal annars fram í The Times of India.

Kozak vísar í stofnskrá Ólympíuleikanna en þar kveður á um að bannað sé vera með áróður á meðan á leikunum stendur. Þá nefnir hann einnig ákvæði í rússneskum lögum sem kveða á um hið sama: að bannað sé að tengja áróður íþróttaviðburðum.

Íslendingar hafa sent fjölmennt fylgdarlið með fimm keppendum sem taka þátt. Þeirra á meðal er Ólafur Ragnar Grímsson forseti Íslands og Illugi Gunnarsson menntamálaráðherra.

Fram hefur komið að Eygló Harðardóttir félagsmálaráðherra sé einnig að fara en hún er ekki að fara á sjálfa Ólympíuleikana heldur Ólympíumót fatlaðra sem er 7.-16. mars næstkomandi en þar verður hún gestur Íþróttasambands fatlaðra. Á þau hefur verið skorað, meðal annars af Samtökunum ´78; sem gera þá kröfu að þau noti tækifærið og sendi markviss skilaboð um réttindi hinsegin fólks, því annað væri meðvirkni með mannréttindabrotum.

Anna Pála Sverrisdóttir, formaður samtakanna, sagði í útvarpsþættinum Harmageddon að Illugi ætlaði að koma sjónarmiðum þeirra á framfæri á Ólympíuleikunum og að hann ætlaði að vera með regnbogalitaðan trefil á setningarathöfninni. Vísir ræddi sérstaklega við Illuga af þessu tilefni.