Ólympíuhugsjónin vegur þyngst og er í forgrunni

Vísir greindi frá því fyrr í dag að Dmitry Kozak, aðstoðarforsætisráðherra Rússlands, hefur varað íþróttamenn sem og áhorfendur sérstaklega við því að vekja athygli á réttindum og málefnum samkynhneigðra meðan á Vetrarólympíuleikunum í Sotsjí stendur. Kozak vísar í stofnskrá Ólympíuleikanna en þar kveður á um að bannað sé vera með áróður á meðan á leikunum stendur. Þá nefnir hann einnig ákvæði í rússneskum lögum sem kveða á um hið sama: að bannað sé að tengja áróður íþróttaviðburðum. Spurt er hvort þetta geti ekki orðið til að binda hendur þeirra stjórnmálamanna sem hugsanlega vilja koma á framfæri athugasemdum við mannréttindabrot rússneskra stjórnvalda.

„Ég ætla ekkert að tjá mig sérstaklega um þetta. Ég er ekki búinn að sjá þessa athugasemd Kozaks og ætla að geyma það að bregðast við þessu. Ég held að þetta sé allt þekkt. Ekkert nýtt. Þetta er eitthvað sem menn vita,“ segir Illugi Gunnarsson íþróttamálaráðherra sem er á leið til Sotsjí en Vísir náði í hann þá er hann er var að undirbúa brottför.

Ef möguleiki býðst

Illugi segir að ef einhver möguleiki kemur upp, þá mun hann koma á framfæri athugasemdum. „Afstaða mín til þessara stefnu rússneskra stjórnvalda er sú sama og annarra, mér þykir hún ógeðfelld framkoma þeirra gagnvart samkynhneigðum. Það liggur fyrir og enginn þarf að velkjast í vafa um það.“

En, muntu koma þeirri skoðun þinni sérstaklega á framfæri?

„Ég hef sagt, bæði í þinginu og annars staðar, að ef það er möguleiki til þess, þá myndi ég vilja gera það. En það þarf þá að vera til þess möguleiki.“

Íþróttamálaráðherrann lendir í Rússlandi á morgun, snemma dags og situr þá hádegisfund með öðrum íþróttamálaráðherrum sem mæta á leikana. Hann segir tilhlökkun ríkjandi. „En, enn og aftur. Ég hef sagt að með engum hætti er hægt að líta svo á að með því að fara á Ólympíuleika séu menn þar með að skrifa undir stefnu stjórnvalda þar sem leikarnir eru haldnir. Með engum hætti. Við erum þarna í boði ólympíunefndarinnar og erum þarna til að taka þátt í ólympíuleikum, og að styðja við ólympíuhugsjónina. Það er þetta sem það snýst um.“

Ólympíuhugsjónin aðalatriðið

Illugi segist ekki hafa fundið annað en að það sé ágætur stuðningur við þá afstöðu að þó menn mæti til Sotsjí sé með engum hætti verið að skrifa uppá einhverja stefnu rússneskra stjórnvalda í mannréttindamálum heldur er þátttaka í þessum einstæða íþróttaviðburði sem þetta er burtséð frá því. „Ég hef bent á það að það eru ólympíuhugsjónin sem þarna gengur fyrir. Því miður er víða pottur brotinn í mannréttindum í heiminum. Sem dæmi má nefna að sumarólympíuleikarnir verða næst í Brasilíu og þar hefur komið fram gagnrýni á hvernig þeir haga sér gagnvart fátæku fólki, verið að jafna heilu hverfin við jörðu. Ýmislegt sem menn vildu ekki skrifa uppá en enn og aftur, það er ólympíuhugsjónin sem mér finnst vera hér í forgrunni. Ábyggilega eru einhverjir sem hefðu kosið að við færum ekki en mér finnst hitt vega þyngra.“