Fjölskylda Politkovsköju krefst enn svara

Rustam Makhmudov var í gær dæmdur til ævilangs fangelsis fyrir morðið á blaðakonunni Önnu Politkovsköju haustið 2006. Sannað þótti að hann hefði hleypt af skotinu sem varð henni að bana í lyftunni í fjölbýlishúsi í Moskvu, þar sem hún bjó.

Frændi hans, Lom-Ali Gaitukajev, fékk einnig ævilangt fangelsi fyrir að hafa skipulagt banatilræðið. Tveir af bræðrum Makhmudovs voru svo dæmdir í tólf og 14 ára fangelsi fyrir aðild að morðinu, en fyrrverandi lögreglumaður í Moskvu, Sergei Khadsjikurbanov að nafni, hlaut 20 ára fangelsi.

Réttarhöldin hafa ekki leitt í ljós neitt um tilefni morðsins eða hvort mennirnir hafi verið fengnir til þess að fremja verkið.

Blaðakonan Politkovskaja hafði í blaðagreinum og bókum ítrekað gagnrýnt Vladimír Pútín forseta fyrir framferði stjórnar hans í Tsjetsjeníu. Hún hafði meðal annars sakað Pútín og stjórn hans um gróf mannréttindabrot í Tsjetsjeníu.

Makhmudov-bræðurnir eru allir frá Tsjetsjeníu og Gaitukajev sömuleiðis.

Fjölskylda Politkovsköju hefur sagt að áfram verði reynt að fá stjórnvöld til þess að komast til botns í málinu.

„Fyrir okkur er mikilvægast að komast að því hver skipaði fyrir um morðtilræðið,“ hafði rússneska fréttastofan ITAR-Tass eftir Ilja Politkovskí, syni hennar.