Hættuástandi aflýst á Arlanda

Lögregla í Stokkhólmi hefur aflýst hættuástandi á Arlanda-flugvelli í Stokkhólmi og segir að „andlega óstöðugur“ maður sé í haldi, grunaður um að standa að baki sprengjuhótunni í morgun.

Stór hluti flugstöðvar 5 var rýmdur auk tveggja flugvéla. „Hann er grunaður um grófar, ólöglegar hótanir,“ segir Lars Byström, talsmaður Stokkhólmslögreglunnar.

Lögreglu barst tilkynning klukkan 8.53 í morgun. Hlið 1 til 10 í gangi A og hlið 11 til 24 í gangi B voru lokuð, auk þess að tvær vélar Germanwings og SAS voru rýmdar. Sprengjuhótunin raskaði ferðum fjölda fluga.

Aftonbladet segir að maðurinn hafi greint áhafnarmeðlimum vélar Germanwings sem var á leið til Hamborgar að sprengja kynni að vera um borð í vél SAS á vellinum. Sagði hann að hann hafi haft á tilfinningunni að sonur hans hafi komið fyrir sprengju um borð í vélinni.