Bjóða upp á surströmming fyrir fund sænskra nasista

Hópur aðgerðasinna hafa ákveðið að bjóða til surströmmingveislu á Götaplatsen í sænsku borginni Gautaborg þar sem nýnasistar hafa boðað þar til fundar seinna í dag.

„Surströmming er gömul og fín sænsk hefð sem nær aftur til sextándu aldar þegar saltskortur kom upp á tímum Gustavs Vasa og þá fyrst og fremst í norðurhluta landsins,“ segir einn forsvarsmanna veislunnar, en margir telja surströmming vera þá matvöru sem lykt­i einna verst í öll­um heim­in­um

Í frétt GT segir að forsvarsmenn veislunnar hafi talið það viðeigandi að bjóða liðsmönnum nýnasistaflokksins, Flokks Svía, til hefðbundinnar sænskrar veislu. Ekki er nákvæmlega ljóst hvaða hópur stendur á bakvið veisluna, en forsvarsmenn hennar lýsa sjálfum sér sem „grasrótarhreyfingu“.

Gestir veislunnar hafa hvatt menn til að mæta nokkru fyrir fund nýnasistanna þannig að lyktin nái að dreifa sér almennilega. Um 300 manns hafa nú boðað komu sína til veislunnar á Facebook. Þá á lögregla einnig von á fjöldi annarra mótmælenda vegna fundar nýnasistanna. Lögregla verður því með talsverðan viðbúnað á staðnum.

Surströmming er síld sem er lát­in gerj­ast í viðartunn­um í nokkra mánuði og síðar komið fyrir í niðursuðudós­um þar sem gerj­un­in held­ur áfram. Dósin bólgnar þá út, en þegar hún er opnuð gýs upp fnyk­ur sem þykir minna á rot­in egg.