Enn leitað í Japan

Meira en fimmtíu manns var í gær enn saknað í útjaðri borgarinnar Hiroshima í Japan, þar sem miklar aurskriður féllu á miðvikudag.

Um það bil 2.500 manns, bæði lögregluþjónar og hermenn, leituðu í eðjunni og í rústum húsa, en nærri fjörutíu lík höfðu þá fundist.

Miklar rigningar hafa verið þarna undanfarna daga og fór svo að tugir húsa urðu fyrir skriðum í næsta nágrenni borgarinnar.

Borgaryfirvöld hafa verið gagnrýnd fyrir seinagang í viðbrögðum, en fólk var ekki beðið um að rýma hættusvæði fyrr en klukkustund eftir að fregnir bárust af fyrstu skriðunum.