Markovic ekki illa meiddur

Meiðsli Lazar Markovic, leikmanns Liverpool, eru ekki jafnslæm og haldið var eftir að hann haltraði af velli í landsleik Serbíu og Armeníu í Yerevan um helgina.

Brendan Rodgers, knattspyrnustjóri Liverpool, er nú þegar búinn að missa nokkra menn í meiðsli í landsliðsferðum, en þar ber helst að nefna markahrókinn DanielSturridge.

Talið var að Markovic yrði ekki klár fyrir leik Serba gegn Albönum á heimavelli í kvöld í undankeppni EM 2016, en hann byrjaði á varamannabekknum.

Markovic afgreiddi alla orðróma um meiðsli sín sjálfur á Facebook þar sem hann sagði: „Ég er klár fyrir leikinn í kvöld. Meiðslin eru ekki jafnslæm og talið var.“

Markovic verður því klár í slaginn með Liverpool í ensku úrvalsdeildinni um næstu helgi sem og stórleikinn gegn Real Madrid í Meistaradeildinni í næstu viku.