Lennon tekur við Bolton

Norður-Írinn Neil Lennon er tekinn við knattspyrnustjórastöðunni hjá B-deildarliði Bolton Wanderers. Hann tekur við starfinu af Dougie Freedman sem hætti með liðið fyrr í mánuðinum.

Lennon hefur verið án starfs síðan hann yfirgaf Celtic í maí. Lennon var fjögur ár við stjórnvölinn hjá Celtic og undir hans stjórn varð liðið þrívegis skoskur meistari og tvívegis bikarmeistari.

„Þetta er mjög krefjandi verkefni og mikil áskorun fyrir mig,“ sagði Lennon í kjölfar ráðningarinnar. „Markmiðið er að ná betri úrslitum en liðið hefur náð að undaförnu og spila fótbolta sem höfðar til stuðningsmanna Bolton.“

Ljóst er að Lennon bíður erfitt verkefni, en Bolton hefur aðeins unnið einn af fyrstu 11 deildarleikjum sínum og situr í botnsæti B-deildarinnar með aðeins fimm stig - fimm stigum frá öruggu sæti.