Vegagerð hefjist um Teigsskóg árið 2016

Vegamálastjóri vonast til að geta hafið vegagerð um Teigsskóg árið 2016 með því að fá gamla umhverfismatið, sem búið var að hafna, endurskoðað vegna breyttra forsendna. 

Deilur um hvort leggja megi Vestfjarðaveg í gegnum Teigsskóg hafa staðið í áratug. Tilraun Ögmundar Jónassonar, fyrrverandi ráðherra vegamála, til að finna annan kost reyndist árangurslaus. Hanna Birna Kristjánsdóttir, núverandi ráðherra málaflokksins, ákvað að aftur skyldi reynt að komast um skóginn en sagði málið fast í stjórnsýsluflækju og taldi koma til greina að Alþingi setti sérlög til að höggva á hnútinn. 



Vegagerðin vill nú freista þess að fá fyrra umhverfismat, sem búið var að hafna, tekið upp að nýju. Hreinn Haraldsson vegamálastjóri sagði í fréttum Stöðvar 2 að ákveðið hefði verið að fara svokallaða endurupptökuleið; að óska eftir því við Skipulagsstofnun að úrskurður hennar frá 2006 yrði tekinn upp að nýju í ljósi breyttra forsendna. Þetta er raunar sú leið sem Skipulagsstofnun hafði áður ráðlagt Vegagerðinni að fara. Breyttar forsendur eru ný veglína sem Vegagerðin segir skerða skóglendið um eitt prósent.

Félagið Fuglavernd ályktaði hins vegar í dag gegn vegagerð um Teigsskóg, - sagði slíkt mikil náttúruspjöll, -  og lagði til jarðgöng undir Hjallaháls. Vegamálastjóri segir þá leið þremur milljörðum króna dýrari að lágmarki. Göng undir Hjallaháls myndu auk þess þýða að vegur yrði áfram um Ódrjúgsháls. 

„Og það eru fleiri slík atriði sem mæla frekar með láglendisleið um Teigsskóg heldur en jarðgöngum. Það er líka ennþá öruggari leið að fara um Teigsskóg en göng,“ sagði Hreinn. 

Vegamálastjóri vonast til að fá framkvæmdaleyfi eftir eitt til eitt og hálft ár og að vegarlagning hefjist árið 2016, og reiknar samt með kærum og mótmælum. 



„Því er ekki lokið, alveg sama hvað leið verður reynd. Það hafa líka verið mótmæli gegn jarðgangaleiðinni. Það kemur líka við landeigendur sumsstaðar og svo framvegis. Þannig að það verður ekki friður um þetta á næstunni. En það er samdóma álit þeirra sem hafa farið í gegnum stjórnsýsluhlutann af þessu að það sé vænlegast að reyna þessa endurupptökuleið,“ sagði vegamálastjóri.