Loftárásir gerðar á Líbíu í síðustu viku

Bandarískir embættismenn segja Egyptar og Sameinuðu arabísku furstadæmin hafa staðið á bakvið loftárásir sem gerðar voru á Líbíu í síðustu viku. Árásirnar beindust gegn uppreisnarmönnum íslamista í landinu.

Í frétt BBC er haft eftir bandarískum heimildarmanni að Bandaríkjastjórn hefði ekki verið látin vita af árásunum. Óttast Bandaríkjastjórn að bandarísk vopn hafi verið notuð í árásunum sem bryti í bága við þá samninga sem gerðir voru þegar vopnin voru seld.

Segir að orrustuvélar Sameinuðu arabísku furstadæmanna hafi haldið frá herflugvelli í Egyptalandi og skotið á stöðvar uppreisnarmanna í kringum alþjóðaflugvöllinn í Trípolí, höfuðborg Líbíu. Íslamistar náðu flugvellinum í Trípolí á sitt vald um helgina.

Egypsk yfirvöld hafa neitað að hafa átt beina aðild að árásunum og Sameinuðu arabísku furstadæmin hafa enn ekki tjáð sig um málið.

Fleiri hundruð hafa fallið í átökum í Trípolí frá því að þau brutust út í júlí síðastliðinn.