Keyrt yfir þrjár grímuklæddar stúlkur

Lögreglan í Kaliforníu leitar nú að eiganda jeppa sem keyrt var á þrjár þrettán ára stúlkur. Þær voru á göngu um íbúðarhverfi í hrekkjavökubúningum í gær þegar keyrt var á þær. Um er að ræða tvíbura og vinkonu þeirra og létust þær allar.

Jeppinn var yfirgefinn skömmu eftir ákeyrsluna en lögreglan veit ekki hvar skráður eigandi hans býr. Lögreglumenn náðu þó fingraförum og DNA sýnum úr bílnum.

AP fréttaveitan hefur eftir konu sem varð vitni að atvikinu og elti jeppann að hún hafi séð ungan mann hlaupa frá bílnum, en hann hafi kallað á einhvern. „Ég sá bara einn, en ég veit að það var einhver annar þarna.“

Lögreglan fór að heimilisfanginu sem skráð var á eiganda jeppans, en hann bjó ekki á heimilinu. Steve Concialdi lýsti þó eftir vitnum að atvikinu. „Það var hrekkjavaka og það var mikið af fólki á ferðinni. Þessir menn yfirgáfu bílinn. Hringdu þeir í einhvern sem sótti þá? Búa þeir í hverfinu? Hlupu þeir inn í hús?“