Hart óhræddur við að taka vítaspyrnu

Joe Hart, markmaður Manchester City og enska landsliðsins er tilbúinn til að taka víti komi til þess að enska landsliðið fari í vítaspyrnukeppni á HM.

Í síðustu tíu stórmótum hefur enska landsliðið dottið sex sinnum út í vítaspyrnukeppni, síðast gegn Ítalíu fyrir tveimur árum.

Stuart Pearce treysti Hart til þess að taka vítaspyrnu á Evrópumóti u-21 árið 2009 en Hart skoraði einnig úr vítaspyrnu fyrir félagslið sitt, Manchester City í æfingarleik gegn LA Galaxy.

„Ég myndi treysta mér í að taka eina spyrnu, ég myndi ekki neita því og það er aldrei að vita. Ég hef gaman af því að taka víti og ég hef tekið víti í vítaspyrnukeppni áður.“

Hart er ekki búinn að gleyma vítaspyrnu ítalska landsliðsmannsins Andrea Pirlo sem vippaði boltanum í mitt markið.

„Hann má eiga það, það var vel gert. Ef boltinn fer yfir línuna er þetta góð vítaspyrna, sama hvernig það gerist en allir hafa sinn hátt á þessu. Rickie Lambert er ein besta vítaskytta sem ég veit um og hann velur sér staðsetningu áður en hann tekur það,“ sagði Hart.