Hefja sókn gegn talibönum í Pakistan

Pakistanski herinn hefur hafið sókn á landi gegn uppreisnarmönnum Talibana í Norður-Waziristan héraði og eru aðgerðir hafnar í stærsta bæ héraðsins, Miranshah. BBC greinir frá þessu.

Að sögn hersins er nú leitað hús úr húsi og hafa pakistanskir hermenn fundið fjölda neðanjarðarganga og náð valdi á byggingum sem uppreisnarmenn hafa notað til að setja saman sprengjur.

Undanfarnar tvær vikur hefur herinn gert loftárásir á bækistöðvar uppreisnarmanna á svæðinu, en talið er að um 370 uppreisnarmenn hafi fallið í árásunum.  

Loftárásunum hefur verið beint að þeim sem lýstu yfir ábyrgð á árásinni á flugvöllinn í Karachi fyrir þremur vikum síðan þar sem yfir 30 manns féllu. Að baki þeirri árás stóðu uppreisnarmenn frá Úsbekistan ásamt pakistönskum talibönum.

Norður-Waziristan er landamærahérað sem liggur að Afganistan og hafa talibanar lengi haft þar sterk ítök.