Klinsmann byrjaður að kvarta undan dómaranum löngu fyrir leik

Jürgen Klinsmann, þjálfari Arons Jóhannssonar og félaga hans í  bandaríska landsliðinu í fótbolta er ekki alltof ánægður með dómarann sem var settur á leik Bandaríkjanna og Belgíu í sextán liða úrslitum HM í Brasilíu sem fer fram á morgun.

Djamel Haimoudi frá Alsír dæmir leikinn en hann dæmdi síðast markalaust jafntefli Englands og Kosta Ríka og þar áður leik Ástralíu og Hollands sem Holland vann 3-2.

„Nei, ég hef ekki góða tilfinningu fyrir þessum dómara. Hann getur talað frönsku við þeirra leikmenn á vellinum en getur síðan ekki talað við okkur. Hann er líka frá landinu sem við unnum á síðasta HM," sagði Jürgen Klinsmann á blaðamannafundi fyrir leikinn.

„Stundum skil ég ekkert í FIFA. Ég veit að það er erfitt að velja rétta dómarann á þessa leiki og ég vona því að þetta sleppi. Hann hefur dæmt tvo leiki á HM til þessa og gerði það vel. Ég vona bara að hann haldi áfram að dæma vel," sagði Klinsmann.

Marc Wilmots, þjálfari Belga, gerði lítið úr athugasemdum Klinsmann. „Dómarinn er mættur í leikinn til þess að dæma leikinn en ekki til þess að tala við leikmenn. Ég ætla annars ekki að láta plata mig út í umræðu um dómarann," sagði Wilmots.