Klinsmann vonast til að Altidore spili

Jurgen Klinsmann, þjálfari bandaríska landsliðsins, segir að hann vonist til að Jozy Altidore spili gegn Belgíu á þriðjudag.

Klinsmann segir einnig að liðið eigi góðan möguleika að slá út Belgíu. Liðin mætast í Salvador á þriðjudaginn, en leikurinn er liður í 16-liða úrslitum heimsmeistaramótsins.

Klinsmann var mikið gagnrýndur í Bandaríkjunum fyrir að segja að það væri óraunhæft fyrir Bandaríkin að stefna á að vinna mótið.

„Við erum með það mikið sjálfstraust að við getum farið inn í leikinn og sagt að við getum unnið Belgíu," sagði þessi 49 ára gamli þjálfari á blaðamannafundi.

„Við erum ekki hræddir við þá."

„Ég var ekki eins ánægður með leikinn gegn Þýskalandi eins og fyrstu tvo leikina í riðlinum. Núna erum við komnir í útsláttarkeppni og allir verða að leggja sig 100% fram."

Jozy Altidore, framherji Bandaríkjana, meiddist í fyrsta leik liðsins, en Klinsmann segir að hann vonist til að Altidore spili gegn Belgíu.

„Við erum bjartsýnir. Hver einasti dagur er skref fram á við. Það eru ellefu dagar síðan hann meiddist og hann lítur betur út með hverjum deginum sem líður," sagði Klinsmann sem vonast til að Altidore verði klár í slaginn á þriðjudaginn.

Aron Jóhannsson kom inn á í stað Altidore í fyrsta leiknum þegar Altidore meiddist en hann hefur setið á bekknum síðustu tvo leiki, þrátt fyrir meiðsli Altidore.