Aron gæti fengið 45 milljónir ef Bandaríkin komast í 8-liða úrslit

Aron Jóhannsson og aðrir leikmenn bandaríska landsliðsins fá hver að lágmarki 8,6 milljónir króna í sinn hlut fyrir þátttöku sína á HM í Brasilíu. Leikmennirnir eiga þó von á enn meiru í vasann fyrir að hafa tryggt sér sæti í 16-liða úrslitum keppninnar, sem liðið gerði í gær.

Hver leikmaður bandríska liðsins fær 6,2 milljónir fyrir að komast í lokahóp Jürgen Klinsmann fyrir mótið en við bætast tæpar 1,9 milljónir fyrir að vera á skýrslu í leikjunum þremur í riðlakeppninni.

Hver leikmaður sem tók þátt í undirbúningsleikjunum þremur í aðdraganda mótsins fékk hálfa milljón króna í sinn hlut þar að auki.

Bónusarnir snarhækka eftir því sem liðinu gengur betur en samkvæmt heimildum Grant Wahl, blaðamanns Sports Illustrated, mega leikmenn liðsins eiga von á að fá allt að 45 milljónum í sinn hlut ef liðinu tekst að komast í fjórðungsúrslit keppninnar.

Bandaríkin tryggði sér í gær sæti í 16-liða úrslitunum og mæta Belgíu á þriðjudagskvöldið.

Wahl segir að þegar Bandaríkin komust í 8-liða úrslit HM 2002 hafi hver leikmaður fengið 203 þúsund dali. „Samkvæmt mínum upplýsingum mun sú upphæð meira en tvöfaldast ef liðinu tekst að leika það afrek eftir,“ skrifar Wahl á si.com.

Annar blaðamaður, Darren Rovell, segir að bandaríska knattspyrnusambandið gefur ekki upp hvernig það skiptir upp þeim bónusum sem það fær frá Alþjóðaknattspyrnusambandinu, FIFA, fyrir frammistöðu sína á HM. En hér fyrir neðan gefur að líta hvernig FIFA verðlaunar löndin fyrir árangurinn í keppninni í Brasilíu.

Undirbúningsstyrkur: 1,5 milljónir bandaríkjadala (170 milljónir króna)

Úr leik í riðlakeppninni: $8 m. (904 m. kr.)

Úr leik eftir 16-liða úrslit: $9 m. (1.017 m. kr.)

Úr leik eftir 8-liða úrslit: $14 m. (1.582 m. kr.)

Fjórða sæti: $20 m. (2.260 m. kr.)

Þriðja sæti: $22 m. (2.486 m. kr.)

Annað sæti: $25 m. (2.825 m. kr.)

Heimsmeistari: $35 m. (3.955 m. kr.)

US Soccer bonus if US loses today: $8 million. Bonus if team advances: $9 million. US Soccer doesn't disclose how they divvy up $

— darren rovell (@darrenrovell) June 26, 2014