Ránalda skelfir íbúa Óslóar

Helmingurinn af íbúum í Ósló segist finna fyrir óöryggi á ferð um borgina. Þetta kemur fram í skoðanakönnun sem gerð var fyrir blaðið VG, en mikil bylgja rána hefur gengið yfir borgina það sem af er mánuðinum.

Alls var tilkynnt um 58 rán á götum úti á fyrstu átján dögum mánaðarins, en 22 hafa verið handteknir vegna þeirra. Innan við einn þriðji svarenda segir það ekki hafa áhrif á líf sitt.

Roger Andresen, aðstoðarlögreglustjóri í Ósló, segist skilja að íbúar séu skelkaðir, en undirstrikar að líkurnar á því að lenda í ræningjum séu giska litlar.