Byssumaðurinn í París nafngreindur

Yfirvöld í Frakklandi hafa nú nafngreint manninn sem handtekinn var í gær og er grunaður um nokkrar skotárásir í París síðustu daga. Maðurinn, Abdelhakim Dekhar var handsamaður klukkan sex í gærkvöldi á bílastæði í úthverfi borgarinnar.

Þetta er ekki í fyrsta sinn sem hann kemst í kast við lögin en árið 1998 var hann fangelsaður fyrir aðild sína að nokkrum banvænum skotárásum í borginni. Maðurinn hefur enn ekki verið yfirheyrður og segir lögreglan að hann hafi verið í annarlegu ástandi þegar hann var handtekinn, franskir miðlar segja að mögulega hafi hann reynt að fyrirfara sér.

Mikil leit hafði staðið yfir að manninum. Hann hafði uppi hótanir í anddyri sjónvarpsstöðvarinnar BFMTV síðasta föstudag.

Á mánudag réðst hann inn í skrifstofur dagblaðsins Liberation, hleypti tvisvar af byssu sinni og særði alvarlega 23 ára mann. Tveimur klukkustundum síðar skaut sami maður úr byssu fyrir utan höfuðstöðvar bankans Société Générale. Enginn særðist í þeirri árás.