Þrír lífshættulega slasaðir eftir gassprengingar í Flórída

Fjöldi fólks slasaðist, þar af þrír lífshættulega, í sprengingum sem urðu í gasstöð í Flórída um klukkan 11 í gærkvöldi að staðartíma. Sprengingarnar voru gríðarlega öflugar og skóku allt nágrenni stöðvarinnar, en á þriðja tug manna var þar að störfum þegar ósköpin gengu yfir.

„Það var eins og bíl hefði ekið á húsið mitt!“ sagði Marni Whitehead sem býr í um kílómetra fjarlægð frá gasstöðinni. Hún segist hafa hlaupið út til að sjá hvað gengi á og hafi þá séð sprengingarnar. „Við vissum strax að að það var gasstöðin, og eftir það greip um sig ofsahræðsla.“



Hún líkti sprengingunum við flugeldasprengingar á þjóðhátíðardaginn. „Það var bara hvellur eftir hvell, eftir hvell."

Yfirvöld rýmdu fyrst um sinn svæðið í kringum stöðina, en ekki hafði frést af meiðslum í öðrum húsum og íbúar fengu fljótlega að snúa aftur heim.

Ekki er talið að eldurinn sem þarna geisar muni breiðast út úr þessu.

Á gasstöðinni er fyllt á própangaskúta til einkanota, og eru jafnan um 53.000 gaskútar geymdir í stöðinni.