Mæðgur beittar ofbeldi og látnar borða hundamat

Tveir karlmenn og ein kona voru handtekin í gær í borginni Ashtown í Ohio-fylki Bandaríkjanna, grunuð um að hafa haldið andlega fatlaðri konu og barnungri dóttur hennar nauðugum í meira en ár og beitt þær margvíslegu ofbeldi.

Að sögn Eric Smith hjá alríkislögreglu Bandaríkjanna voru mæðgurnar læstar inni í herbergi með skriðdýri, neyddar til að borða hundamat og hótað með vopnum og eiturslöngum. Konan fékk þó að fara út af heimilinu til þess að sinna ýmsum skyldum sem á hana voru lagðar, en hún sá meðal annars um öll innkaup heimilisins.

Þremenningarnir eiga yfir höfði sér ákæru fyrir frelsissviptingu í ávinningsskyni, en þeir eru meðal annars sagðir hafa notað félagslegar bætur konunnar til eiturlyfjakaupa. Þá er þeim einnig gefið að sök að hafa veitt konunni áverka með grjóti í þeim tilgangi að koma höndum yfir lyfseðilsskyld verkjalyf.

Hin handteknu eru á aldrinum 26 til 33 ára og segir móðir eins þeirra, Jordie Callahan, að ekkert sé til í ásökununum.

Rannsóknarlögreglumenn segja Callahan, ásamt Jessicu Hunt, sem einnig var handtekin, hafa lokkað konuna til þess að flytja inn í íbúð þeirra. Þar bjó parið fyrir ásamt fjórum sonum Hunt og fjölda skriðdýra og hunda. Sá þriðji, Daniel Brown, er vinur parsins og talinn hafa tekið þátt í ofbeldinu.

Handtekin fyrir að stela sælgæti

Í október í fyrra var konan (brotaþoli), sem ekki hefur verið nafngreind, handtekin fyrir að stela sælgæti úr verslun. Lögreglumennirnir töldu að ekki væri allt með felldu og við yfirheyrslur sagði konan þeim frá ofbeldinu sem mæðgurnar höfðu orðið fyrir.

Callahan sýndi lögreglumönnum myndskeið á síma sínum þar sem konan sást beita dóttur sína ofbeldi. Konan gaf þá skýringu að þremenningarnir hefðu neytt sig til að berja barnið og hótað í kjölfarið að sýna lögreglu myndbandið ef hún kæmi upp um þau.

Dótturinni var komið fyrir á fósturheimili eftir handtöku móðurinnar og hófst rannsókn málsins í febrúar. David Marcelli, lögreglustjóri í Ashland, segir þremenningana hafa ítrekað komist í kast við lögin.