Fundu líkamsleifar í garði Goodfellas-mafíósa

Bandaríska alríkislögreglan í samstarfi við lögregluna í New York fundu í vikunni líkamsleifar heima hjá mafíósanum Jimmy „the gent“ Burke, sem lést árið 1996 í fangelsi.

Sá varð heimsfrægur eftir að stórleikarinn Robert De Niro túlkaði hann í kvikmyndinni Goodfellas sem er byggð á sannsögulegum atburðum.

New York Post greinir frá því að lögreglan hafi fundið líkamsleifar í garðinum og grunur leikur á að leifarnar tengist uppgjöri vegna rúmlega 30 ára gamals ráns á Kennedy flugvellinum.

Ránið er í daglegu tali kallað Lufthansa-ránið, en Jimmy er grunaður um að hafa skipulagt það, þó engin játning liggi fyrir hvað það varðar.

Ræningjarnir höfðu 6 milljónir dollara upp úr krafsinu. Til gamans má geta að sex milljónir dollara eru 740 milljónir króna á núvirði.

Hús Jimmys er í eigu dætra mafíósans en þær leigja það út. Rannsókn lögreglunnar beinist einnig að kjallara hússins.

Kvikmyndin Goodfellas er byggð á ævisögu glæpamannsins Henry Hill sem leikstjórinn Martin Scorsese gerði ódauðlega árið 1990.

Henry gaf sig fram við alríkislögregluna árið 1980 og vitnaði gegn Lucchese-mafíunni og kom þannig félögum sínum á bak við lás og slá - þar á meðal Jimmy. Hann hóf svo nýtt líf í vitnavernd á vegum bandaríska ríkisins.

Réttarmeinafræðingar eiga eftir að skoða líkamsleifarnar úr garði mafíósans og er lögreglan þögul sem gröfin varðandi smáatriði rannsóknarinnar.

Hér fyrir ofan má sjá sýnishorn úr kvikmyndinni.