Merkel hringdi í Obama vegna hlerana

Barack Obama, forseti Bandaríkjanna, er í vanda vegna hlerana bandarísku leyniþjónustunnar. Í gær fékk hann símtal frá Angelu Merkel, kanslara Þýskalands, en talið er að sími hennar hafi verið hleraður.

Merkel hringdi í Obama í gær og krafðist útskýringa á málinu. Kanslarinn mun hafa tjáð Obama að það væri alvarlegur trúnaðarbrestur sé svo að Bandaríkjamenn hafi hlerað síma hennar. Samkvæmt heimildum Der Spigel mun Obama hafa fullvissað Merkel um að engar hleranir hefðu átt sér stað.

Talsmaður Hvíta hússins, Jay Carney, svaraði spurningum blaðamanna í gær. Hann gat aftur á móti ekki svarað með fullri vissu hvort að bandaríska leyniþjónustan hefði hlerað persónulegan síma Merkel í fortíðinni.

Samkvæmt leynilegum skýrslum þá mun leyniþjónusta Bandaríkjanna einnig hafa hlerað um 70 milljónir símtala í Frakkalandi yfir 30 daga tímabil á síðasta ári. Forseti Frakklands, François Hollande, fékk símtal frá Obama á mánudag vegna málsins.

Málið þykir allt hið vandræðalegasta fyrir stjórn Obama. Þýskaland og Bandaríkin hafa á síðustu árum verið nánir samstarfsaðilar.