Ofsahræðsla á hnefaleikakeppni

Að minnsta kosti 17 manns létust og 39 særðust við það að troðast undir þegar slagsmál brutust út meðal áhorfenda á hnefaleikakeppni í gær í Papau-héraði Indónesíu.

Flestir hinna látnu eru konur. Meðal hinna slösuðu eru 17 karlmenn, 13 konur og 9 börn. Slagsmálin brutust út eftir að ágreiningur reis um stigagjöf í bardaganum sem leiddi svo til þess að um 1.500 manns reyndu að flýja leikvang í Nabire-borg en þar voru aðeins tvær útgönguleiðir. Þarna voru öryggisverðir á vegum hers og lögreglu en ekki varð við neitt ráðið þegar ofsahræðsla greip um sig meðal mannfjöldans, að sögn Reuters.