Söfnunaráráttan hófst í Írak

Breski blaðamaðurinn Glenn Greenwald segir að hömluleysið í njósnum bandarískra stjórnvalda megi rekja til óstjórnlegrar söfnunaráráttu Keith Alexander, yfirmanns bandarísku þjóðaröryggisstofnunarinnar, NSA. 

Þetta er „ástæða þess að Edward Snowden fórnaði frelsi sínu til að geta stigið fram” og sagt heiminum frá því sem er í gangi. 

Greenwald skrifar um þetta á vef breska dagblaðsins The Guardian nú í morgun, og vísar til umfjöllunar um Keith Alexander í bandaríska dagblaðinu  The Washington Times.

Þegar Alexander kom til starfa sem yfirmaður NSA árið 2005 voru árásir með heimagerðum sprengjum hryðjuverkamanna í hámarki í Írak. Til að ná utan um vandann tók Alexander fljótlega þann pól í hæðina að „safna þessu öllu”, eins og það var orðað.

Öllum net- og símasamskiptum í Írak var safnað saman og svo var hægt að leita í safninu að einhverju, sem gæti komið Bandaríkjamönnum á sporið um það sem uppreisnarmenn væru að bauka.

Í greininni í Washington Post er því ítarlega lýst hvernig smám saman var farið að beita þessari aðferð, sem til að byrja með var einungis notuð í Írak, yfir á öll samskipti fólks í Bandaríkjunum og heiminum öllum.

„Frekar en að leita að einni nál í heystakknum, þá var hans aðferð þessi: Söfnum saman öllum heystakknum,” er haft eftir fyrrverandi bandarískum leyniþjónustumanni.

„Þeu átta ár sem hann hefur farið með forystuna í fjarskiptaeftirlitsstofnun landsins hefur Alexander, sem nú er 61 árs, hægt og hljótt komið á byltingu í getu stjórnvalda til að safna saman upplýsingum í nafni þjóðaröryggis,” segir ennfremur í The Washington Post: „Og rétt eins og hann gerði í Írak, þá hefur Alexander beitt þrýstingi til að ná fram öllu sem hann getur náð fram: tækjabúnaði, fjármunum og lagalegum heimildum til að safna saman og geyma gríðarlegt magn af hráum upplýsingum um samskipti fólks í Bandaríkjunum og erlendis.”

Greenwald segir þessa grein í The Washington Post segja allt sem segja þarf um málið og ástæðu þess að Edward Snowden hafi ákvðið að ljóstra upp um allt saman.

Greenwald hefur verið í góðum tengslum við Snowden og talað máli hans í fjölmiðlum. Nú síðast um helgina skýrði Greenwald frá því, í viðtali við fjölmiðla í Suður-Ameríku, að Snowden búi enn yfir miklu magni af gögnum um starfsemi NSA.

Snowden hafi ekki í hyggju að birta þessi skjöl, en þau séu geymd dulkóðuð víða um heim og verði birt fari svo að Snowden láti lífið fyrir tilstilli bandarískra stjórnvalda.