Nýnasisti reyndist þeldökkur að hluta

Yfirlýstur nýnasisti frá Norður Dakóta-fylki Bandaríkjanna fékk þær óvæntu fregnir í spjallþætti að hann væri ekki hvítur nema að hluta.

Hinn 62 ára gamli Craig Cobb, sem hefur meðal annars lýst yfir áhuga á því að halda tónlistarhátíð í bænum Leith tileinkaða tónlist nýnasista, var gestur spjallþáttarins The Trisha Goddard Show og í þættinum opinberaði þáttastjórnandinn niðurstöður DNA-prófs sem Cobb fór í.

Niðurstöðurnar voru ekki þær sem Cobb vonaðist eftir, en í ljós kom að hann er af afrískum uppruna að hluta, eða sem nemur 14 prósentum. Uppskáru niðurstöðurnar hlátrasköll áhorfenda og viðbrögð Cobbs má sjá í myndbandinu hér fyrir neðan.