Missti 150 kíló með hjálp konungs

Sádiarabískur karlmaður hefur misst 150 kíló með hjálp Abdullah konungs á aðeins þremur mánuðum.

Hinn tvítugi Khalid Mohsin Shaeri vó 610 kíló þegar hann var fluttur af heimili sínu með lyftara að fyrirskipun konungs, en hann hafði ekki getað yfirgefið svefnherbergi sitt í tvö og hálft ár vegna ofþyngdar.

Farið var með Shaeri á spítala í borginni Jazan í suðvesturhluta landsins þar sem honum var veitt aðstoð við að grenna sig, bæði með skurðaðgerðum og breyttu mataræði.

Að sögn læknis á spítalanum gengur meðferðin vel og bæði andleg og líkamleg heilsa Shaeri fer batnandi. Mikið eftirlit er haft með alvarlegustu fylgikvillum ofþyngdarinnar, en þeir eru sykursýki, hjarta- og lungnasjúkdómar.