Sakar yfirvöld um vanhæfni

Pakistönsk stjórnvöld, einkum leyniþjónusta hersins, eru sökuð um vanhæfni í tengslum við leitina að Osama bin Laden og drápið á honum í Abottabad vorið 2011.

Pakistönsk rannsóknarnefnd hefur sent frá sér 336 blaðsíðna skýrslu um málið, sem arabíska fréttastofan Al Jazeera hefur birt.

Í skýrslunni koma fram margvíslegar upplýsingar um daglegt líf bin Ladens í Abottabad, þar sem hann leyndist síðustu árin. Meðal annars kemur fram að hann hafi iðulega gengið um með kúrekahatt þegar hann brá sér út í garð. Það hafi verið til þess að hann þekktist síður á ljósmyndum úr gervihnöttum.