Dreginn upp úr rotþró almenningssalernis

Karlmaður var handtekinn í almenningsgarði í Oklahoma eftir að hann fannst ofan í rotþró almenningssalernis þar sem hann lá á gægjum.

Ambra Reynolds var með sjö ára dóttur sinni á salerninu þegar mæðgurnar komu auga á manninn þar sem hann starði á þær upp úr gatinu.

„Hann skreið þarna niður og horfði á fólk sem notaði salernið,“ segir Shannon Clark, lögreglustjóri í Tulsa.

Slökkviliðsmenn drógu manninn, hinn 52 ára Kenneth Enslow, upp úr rotþróinni. Var hann útataður mannasaur og þurfti að spúla af honum áður en farið var með hann á spítala.

Enslow gaf þá skýringu á hátterni sínu að kærasta sín hefði slegið sig í höfuðið með felgulykli og hent honum niður í salernið. Lögreglustjórinn segir enga áverka benda til þess og hefur Enslow verið sendur í geðrannsókn, en hann er ákærður fyrir blygðunarsemisbrot.

Málið fer fyrir dóm þann 15. júlí og verði Enslow sakfelldur gæti hann átt yfir höfði sér ársfangelsi og 5.000 dala sekt.