Snowden fær að yfirgefa flugvöllinn

Yfirvöld í Rússlandi hafa gefið bandaríska uppljóstraranum Edward Snowden leyfi til að yfirgefa flugvöllinn í Moskvu og fara inn í landið á meðan beiðni hans um tímabundið hæli í landinu er tekin fyrir.

Frá þessu greinir CNN sem hefur upplýsingarnar frá rússneskum fjölmiðlum.

Snowden hefur dvalið á alþjóðaflugvellinum í Moskvu frá því 23. júní eftir að hann kom með flugi frá Hong Kong. Hann hefur ekki getað yfirgefið flugvöllinn því Bandaríkjamenn ógiltu vegabréfið hans.

Fyrir átta dögum síðan sótti hann um hæli í Rússlandi. Yfirvöld í landinu taka nú beiðni hans fyrir. Ef hann fær hæli tímabundið mun hann geta búið í Rússlandi og jafnvel ferðast til annarra landa í að minnsta kosti eitt ár, segir lögfræðingur hans.

Bandaríska leyniþjónustan hefur ekki heimild til að handataka hann á meðan hann dvelur í Rússlandi.