Áður óþekkt verk eftir Chagall og Matisse fundust

Áður óþekkt listaverk eftir meistara á borð við Marc Chagall og Henri Matisse leyndust á meðal listaverkanna 1.400 sem fundust í München nýverið.

Sérfræðingum hefur enn ekki gefist tími til að kanna nema rúman þriðjung verkanna, og jafnvel ekki allt það til hlítar.

Verkin fundust í febrúar á síðasta ári, fagmannlega geymd í einu herbergi í ríkmannlegri íbúð í München, Eigandi íbúðarinnar hefur ekki óskað eftir því að fá þau afhent aftur, en sérfræðingum hefur enn ekki tekist að skera úr um það hvort þau séu öll illa fengin.

Ljóst þykir þó að verkin voru í fórum þýskra nasista á stríðsárunum. Meðal verkanna eru listaverk eftir þekkta listamenn á borð við Pablo Picasso, Max Liebermann og Ernst Ludwig Kirchner.

Það tók lögregluna þrjá daga að flytja verkin út úr íbúðinni í örugga geymslu annars staðar.

Lögreglan komst á sporið við hefðbundna handahófsleit tollvarða í lest á leiðinni frá Zürich í Sviss til München í Þýskalandi árið 2010.