Dularfulla stúlkan hefur ekkert tjáð sig í mánuð

„Þekkir þú þessa stúlku?“ segir í tilkynningu frá lögreglunni í Dyflinni sem birti í gær myndir af stúlku einni sem fannst ráfandi og ringluð í borginni fyrir tæpum mánuði. Frá þessu segir á fréttavef Sky.

Hún hefur ekkert tjáð sig við lögreglu síðan hún fannst, en líklegt þykir að hún sé erlend, mögulega frá Austur-Evrópu.

Hún er talin geta verið allt niður í fjórtán ára gömul og hefur verið í umsjá félagsmálayfirvalda síðan hún fannst. Hún er um 170 sentimetrar á hæð, grannvaxin, með sítt ljóst hár. Hún er með spangir á tönnum, en læknar hafa ekki getað ráðið í uppruna hennar út frá þeim.

Lögreglan leitar nú allra leiða til að komast að uppruna stúlkunnar og hefur varið rúmlega tvö þúsund mannaflsstundum til þess. Meðal annars hefur verið leitað aðstoðar Interpol en án árangurs.