Mótmæltu sáttavilja Íransforseta

Tugir þúsunda Írana komu saman utan við bandaríska sendiráðið í Teheran í gær til að lýsa andúð sinni á Bandaríkjunum.

Mótmæli fyrir utan sendiráðið eru árviss viðburður, jafnan haldinn 4. nóvember til að minnast þess þegar hópur manna réðst inn í sendiráðið þennan dag árið 1979 og hélt starfsmönnum þess í gíslingu í rúmt ár.

Óvenju góð þátttaka var í mótmælunum í gær, og er það rakið til þess að harðlínufólk í Íran er afar ósátt við sáttatilburði Hassans Rúhaní forseta, sem undanfarið hefur reynt að bæta samskiptin við Bandaríkin.

Aðalræðumaður var Saíd Djalílí, sem bauð sig fram gegn Rúhaní í sumar en tapaði.

„Að berjast gegn alþjóðlegum hroka og fjandsamlegri stefnu Bandaríkjanna er tákn um þjóðareiningu okkar,“ sagði Djalílí, sem eftir kosningatapið var gerður að aðalsamningamanni Írans í kjarnorkudeilunum við Vesturlönd.

Djalílí er einn helsti andstæðingur Rúhanis, en um leið er Djalílí ráðgjafi Ali Khameinís erkiklerks, sem í reynd ræður mestu í landinu. Khameini hefur á hinn bóginn stutt sáttaviðleitni Rúhanís.