Sjö hundruð bjargað úr hafinu

Meðan leiðtogar Evrópusambandsins ræddu málefni flóttamanna á tveggja daga fundarhöldum sínum í Brussel björguðu Ítalir meira en 700 flóttamönnum af fimm yfirfullum bátum á Miðjarðarhafinu.

Leiðtogar ESB-ríkjanna höfðu einsett sér að finna lausnir á flóttamannavandanum í Miðjarðarhafi eftir að um 365 flóttamenn drukknuðu þann 3. október síðastliðinn þegar yfirfullum báti þeirra hvolfdi út af eyjunni Lampedusa.

„Við ræddum lengi um innflytjendamál,“ sagði Angela Merkel Þýskalandskanslari í Brussel í gær. „Við lýstum öll mikilli hryggð vegna atburðanna sem við þurftum að horfa upp á út af Lampedusa.“

Nicolas Berger, starfsmaður mannréttindasamtakanna Amnesty International, harmar hins vegar aðgerðarleysi leiðtoganna.