Mengun frá iðnaði dró úr tíðni fárviðra

Loftmengun frá iðnaði megnið af tuttugustu öldinni hafði að öllum líkindum þau hliðaráhrif að fárviðrum á Atlantshafinu fækkaði.

Þegar aðgerðir gegn iðnaðarmengun tóku að skila árangri á síðustu áratugum aldarinnar virðist þetta hafa snúist við, fárviðrum tók að fjölga á ný.

Þetta er niðurstaða rannsóknar á vegum bresku veðurstofunnar, sem birt hefur verið í tímaritinu Nature Geoscience.

Vísindamennirnir segja að svifagnir frá iðnaðarútblæstri hafi þau áhrif að skýin verði bjartari, með þeim afleiðingum að meira af sólarljósinu endurkastist frá þeim. Áhrifin af þessu á hitastig sjávar dragi úr líkunum á því að fárviðri myndist.

Í tímaritinu taka vísindamennirnir fram að mikil óvissa ríki þó enn um samspil þessa þáttar við aðra þætti loftslagsbreytinga, svo sem útblástur gróðurhúsalofttegunda, rykmengun og ösku frá eldfjöllum.