Barnaklám hjá starfsmanni frístundamiðstöðvar

Ríkissaksóknari hefur gefið út ákæru á hendur rúmlega sextugum starfsmanni á frístundaheimili fyrir vörslu barnakláms. Á annað hundrað ljósmyndir sem sýndu börn á kynferðislegan og klámfenginn hátt fundust í tölvu hans í desember.

Maðurinn hefur undanfarin ár starfað sem verkefnisstjóri á barnasviði frístundaheimilis fyrir börn og unglinga. Hann hefur verið í launuðu leyfi síðan málið kom upp, að sögn Bjarna Brynjólfssonar, upplýsingafulltrúa Reykjavíkurborgar.

Hann segir borgaryfirvöld líta málið mjög alvarlegum augum. „Það er auðvitað mjög alvarlegt mál þegar starfsmenn sem eru að vinna með börnum og unglingum verða uppvísir að svona nokkru. Viðbrögð borgarinnar eru eftir því.“ Bjarni segir foreldrum barna á frístundaheimilinu ekki hafa verið gert viðvart um málið.

Lögregla lagði upphaflega hald á tölvu mannsins í júlí í fyrra, eftir að tveir menn sem höfðu ráðist á hann tjáðu lögreglu að þeir hefðu gert það vegna þess að hann væri „barnaperri“.

Maðurinn var hins vegar ekki handtekinn fyrr en í desember. Hann hafði tekið sér veikindaleyfi vegna árásarinnar í millitíðinni en snúið aftur til starfa nokkrum dögum áður en hann var handtekinn.

„Það er svo mikið af verkefnum í tölvurannsóknardeildinni að tölvan var ekki skoðuð fyrr en löngu síðar. Þetta var ekki forgangsverkefni,“ segir Björgvin Björgvinsson, yfirmaður kynferðisbrotadeildar lögreglunnar. „Það er mikið álag á tölvudeildina og þetta er ein afleiðing þess.“

Árásarmenn fengu þunga dóma

Daniel Arciszewski og Snorri Sturluson fengu í september í fyrra þriggja og tveggja og hálfs árs fangelsisdóma fyrir að ráðast inn til mannsins á heimili hans í Breiðholti og ræna hann, auk nokkurra smávægilegri brota.

Tvímenningarnir bundu hann í stól, hótuðu honum líkamsmeiðingum og lífláti og neyddu hann til að millifæra á þá á fimmta hundrað þúsund. Þeir bundu hann á höndum með rafmagnssnúru ofan í baðkari, tróðu upp í hann tusku og límdu fyrir. Þeir héldu honum nauðugum í íbúðinni í sex klukkustundir og höfðu síðan ýmsar eigur hans á brott með sér.