Fjórir hafa látist og fimm þúsund slasast

Ekkert lát hefur orðið á átökum lögreglu og mótmælenda í Tyrklandi síðan Recep Tayyip Erdogan forsætisráðherra sendi óeirðalögregluna til að rýma Gezi-garð og Taksim-torg í Istanbúl á laugardag.

Eitt þúsund lögreglumenn frá öllum landshlutum hafa verið fluttir til Istanbúl í tilraun til að bæla mótmælin niður. Að minnsta kosti fjórir hafa látist og um fimm þúsund slasast síðan átökin hófust.

Mótmælendur voru hraktir úr garðinum og af torginu með táragasi, háþrýstivatnsbyssum og gúmmíkúlum og eftir rýminguna mættu jarðýtur á svæðið og jöfnuðu leifarnar af búðum mótmælenda við jörðu.

Mótmælendur snerust til varna með spýtum, grjóti og öðru lauslegu. Átökin stóðu enn yfir í gærkvöldi og virtist ekkert lát á þeim.

Forsvarsmenn mótmælenda hafa hvatt fólk til að fjölmenna í miðborg Istanbúl og halda baráttunni áfram en þar mætir þeim mikill flokkur lögreglumanna sem krefjast skilríkja og leita í töskum. Auk hinna þúsund lögreglumanna úr öllum héruðum landsins hafa um 350 lögreglumenn sem störfuðu á flugvellinum í Istanbúl verið kallaðir til starfa í miðborginni, að sögn tyrknesku fréttastofunnar Dogan.

Lögregla beitti einnig táragasi og háþrýstivatnsbyssum gegn mótmælendum í Ankara í gær, en þar blossuðu mótmælin upp eftir að fregnir bárust af rýmingu Gezi-garðsins. Það sem byrjaði sem mótmæli gegn fyrirhugaðri eyðileggingu Gezi-garðsins í lok maí er orðið að fjöldauppreisn gegn yfirvöldum sem fréttaskýrendum ber saman um að hafi brugðist við af fádæma hörku og þannig magnað enn þá elda óánægju með ríkisstjórn Erdogans sem fyrir brunnu í landinu.

Erdogan er þó fráleitt á þeim buxunum að draga úr hörkunni og sagði á samkomu með þúsundum stuðningsmanna í útjaðri Istanbúl í gær að hann myndi gersigra andstæðinga sína í kosningunum á næsta ári.