Hætt við viðræður milli Kóreuríkja á morgun

Stjórnvöld í Suður-Kóreu sögðu fyrr í dag að búið væri að aflýsa tveggja daga löngum fundahöldum milli Suður- og Norður-Kóreu. Fundahöldin áttu að hefjast í Seúl á morgun.

Ekki er ljóst hvort viðræðunum hefur verið frestað eða aflýst með öllu. Viðræðurnar hefðu verið fyrstu viðræður háttsettra embættismanna ríkjanna tveggja í sex ár.

Embættismennirnir ætluðu að ræða um samvinnuverkefni ríkjanna, ekki síst iðnaðarsvæðið Kaesong, sem var lokað í apríl síðastliðnum. Þá átti að ræða um sameiningu sundraðra fjölskylda og önnur mannúðarmál.