Ríkjum með ein hjúskaparlög fjölgar

Þrettán ríki heimsins hafa nú heimilað hjónabönd samkynhneigðra og í tveimur til viðbótar munu slík lög taka gildi í haust. Frakkland varð í síðustu viku þrettánda ríkið en lögin fóru ekki í gegn þar þegjandi og hljóðalaust.

Mikil mótmæli hafa brotist út reglulega vegna málsins á götum Parísar undanfarin misseri. Stórar mótmælagöngur gegn hjónaböndum samkynhneigðra hafa verið haldnar og í kjölfarið hafa einnig verið haldnar fjölmennar samkomur fólks sem styður ein hjúskaparlög.

Þegar lögin tóku gildi í byrjun síðustu viku urðu mótmælin ofbeldisfull og fjöldi fólks var handtekinn. Á miðvikudag gekk svo fyrsta parið í hjónaband, þeir Vincent Autin og Bruno Boileau. Þeir gengu í hjónaband í Montpellier og það var borgarstjóri borgarinnar sem gaf þá saman. Mikil öryggisgæsla var í kringum viðburðinn og honum var einnig sjónvarpað.