Sá eini með yfir helming marka síns liðs

Alfreð Finnbogason hefur skipað sér í sérstöðu meðal leikmanna hollensku úrvalsdeildarinnar í fótbolta, en Heerenveen-liðið treystir mikið á íslenska landsliðsframherjann, sem er nú annar markahæsti maður deildarinnar með 19 mörk í 23 leikjum. Marco van Basten, þjálfari hollenska liðsins, getur þakkað Alfreð fyrir að liðið hefur fjarlægst fallbaráttuna í undanförnum leikjum.

Alfreð hefur skorað 19 af 36 mörkum SC Heerenveen í deildinni á þessu tímabili, sem gerir 53 prósent marka liðsins. Hann er eini leikmaður deildarinnar sem hefur skorað meira en helming marka síns liðs og Alfreð er jafnframt búinn að eiga þátt í 61 prósenti markanna, annaðhvort með því að skora eða leggja upp fyrir félaga sína í liðinu.

Alfreð skoraði enn fremur fjögur af sex bikarmörkum Heerenveen-liðsins á þessu tímabili og er því alls með 23 af 42 mörkum Heerenveen í deild og bikar á tímabilinu, sem gera 55 prósent markanna.

Sá sem kemst næst Alfreð er Jozy Altidore hjá AZ Alkmaar, en hann hefur skorað 17 af 35 mörkum AZ í deildinni, sem gera 48,6 prósent marka liðsins. Wilfried Bony, markahæsti leikmaður deildarinnar, er síðan í þriðja sætinu, en hann hefur skorað 46 prósent marka Vitesse-liðsins, eða 23 af 50.

Mikilvægi marka Alfreðs í undanförnum tveimur leikjum Heerenveen er óumdeilanlegt, en sigurmörk hans í tveimur leikjum í röð hafa séð til þess að Heerenveen hækkaði sig um heil fimm sæti með þessum tveimur sigurleikjum, frá 14. sæti upp í það níunda. Það er reyndar langt upp í áttunda sæti (6 stig), sem er síðasta sætið sem gefur þátttökurétt í umspili fyrir Evrópudeildina.

Alfreð hefur nú aðeins mistekist að skora í tveimur af síðustu ellefu leikjum sínum í hollensku deildinni og í öðrum þeirra spilaði hann aðeins fyrri hálfleikinn eftir að liðið missti mann af velli fyrir hlé.

Heerenveen fær topplið PSV í heimsókn um helgina og þar verður róðurinn þungur enda tapaði Heerenveen fyrri leiknum 1-5. Alfreð er búinn að skora í fjórum heimaleikjum í röð og alls í 8 af 10 heimaleikjum tímabilsins. hann er því alltaf líklegur á Abe Lenstra vellinum í Heerenveen.