Njósnað um einstaklinga á samskiptasíðum

Bandaríska fyrirtækið Raytheon hefur hannað leitarvél sem þefar uppi upplýsingar um einstaklinga á samskiptasíðum á borð við Facebook og Twitter. Fyrirtækið, sem framleiðir vopn og tekur að sér verk á sviði öryggisþjónustu og hernaðar, hefur enn ekki selt neinum þennan hugbúnað.

Breska dagblaðið Guardian hefur hins vegar komist yfir myndband sem lýsir því hvernig leitarvélin virkar. Leitarvélin heitir RIOT, sem stendur fyrir Rapid Information Overlay Technology. Með henni er auðveldlega hægt að ná í allar upplýsingar sem einstaklingar hafa sett inn á samskiptasíður sínar.

Þannig er hægt að fá býsna skýra heildarmynd af viðkomandi einstaklingi, til dæmis hverja hann umgengst, hvaða áhugamál hann hefur og hvert hann er vanur að ferðast. Allt þetta er hægt að staðsetja á korti með fáeinum músarsmellum og fá upp myndir af viðkomandi, vinum hans og stöðunum sem hann hefur komið til.

Í myndbandinu er tekið dæmi af einum starfsmanni fyrirtækisins, sem heitir Nick, og sýnt hve auðvelt er að finna út að miklar líkur séu á því að hitta á hann á tiltekinni líkamsræktarstöð klukkan sex að morgni flesta daga vikunnar.- gb