Annar fékk hæli en hinn ekki

Tveir menn sem segjast vera fyrsta samkynhneigða parið frá Úganda til að ganga í hjónaband eiga nú á hættu að verða aðskildir á nýjan leik. Annar hefur fengið hæli í Svíþjóð en hinum var neitað. Mennirnir giftu sig í Svíþjóð fyrir nokkrum vikum.

Lawrence Kaala og Jimmy Sserwadda voru par í Úganda en Sserwadda flúði landið án vitneskju Kaalas árið 2008. Þá hafði hann verið handtekinn og laminn fyrir samkynhneigð. Hann segist ekki hafa þorað að segja manni sínum frá flóttanum. Sserwadda komst til Svíþjóðar og fékk hæli þar. Undanfarin ár hefur hann beitt sér mikið í málefnum hinsegin fólks og árið 2011 sá Kaala mynd af honum í sænsku blaði, en hann hafði þá einnig flúið til Svíþjóðar. Kaala hringdi í Sserwadda og þeir ákváðu fljótlega að ganga í hjónaband.

Hælisumsókn Kaala var hafnað og hann ætlar að áfrýja þeim úrskurði. „Þeir trúa ekki sögunni hans,“ sagði Sserwadda við sænsku vefsíðuna The Local. „Hann getur ekki farið aftur þangað [til Úganda]. Hann yrði handtekinn strax.“

Mennirnir vinna nú að áfrýjun málsins.