Erlent

Hápunktar úr starfi Benedikts páfa

Kolbeinn Tumi Daðason skrifar
Kveðjustundin verður þann 28. febrúar.
Kveðjustundin verður þann 28. febrúar. Nordicphotos/AFP
Benedikt sextándi páfi tilkynnti í gær að hann myndi láta af störfum undir lok mánaðarins. Tilkynningin kom mjög á óvart enda sex hundruð ár síðan páfaskipti eru tilkomin án andláts páfa.

Fréttavefur BBC hefur tekið saman tíu augnablik á tæplega átta ára setu Benedikts í páfastóli. Óhætt er að segja að ýmislegt hafi drifið á daga páfans á þessum tíma.

1. Nýr páfi krýndur
John Ratzinger kjörinn páfi.Nordicphotos/Getty
Benedikt sextándi var 78 ára gamall þegar hann var kjörinn páfi í apríl 2005. Hann var elsti maðurinn til þess að taka við starfinu í 275 ár. Hann hafði gegnt stöðu yfirkardinála í Vatíkaninu í 24 ár.

2. Tók púlsinn á múslimum
Í Bláu moskunni í Istanbúl.Nordicphotos/Getty
Páfinn reyndi að bæta samskipti á milli trúarhópa með því að sækja Bláu moskuna í Istanbúl heim árið 2006. Þar lagðist hann á bæn við hlið múslimskra klerka.

Þetta var aðeins í annað skiptið í sögunni sem páfi sótti heim heilagan stað múslima og vakti mótmæli hjá sumum hópum múslima.

3. Áframhaldandi skírlífi
Nordicphotos/Getty
Í páfatíð Benedikts sextánda var lögð áhersla á að kaþólska kirkjan viðhefði sínum hefðbundnu og íhaldsömu gildum á tímum mikilla breytinga. Í mars 2007 neitaði hann að umræða færi fram varðandi skírlífi þjóna kirkjunnar og staðfesti að skírlífi yrði áfram skilyrði hjá kaþólskum prestum.

Hann tók einnig af allan vafa varðandi það að fráskildir kaþólikkar sem gifta sig á ný mættu ekki ganga til altaris. Auk þess væru fóstureyðingar, líknardráp og hjónabönd samkynhneigðra einfaldlega ekki til umræðu.

4. Minntist fórnarlamba helfararinnar
Páfinn talar í Vín.Nordicphotos/Getty
Benedikt páfi sótti Austurríki heim í september 2007 og vottaði fórnarlömbum helfararinnar virðingu sína á minningarathöfn í Vínarborg. Páfinn, sem ólst upp í Bæjaralandi í Þýskalandi, lýsti yfir samhug og vináttu í garð gyðinga.

5. Baðst afsökunar á níði
Páfinn blessar barn á degi til heiðurs kaþólskum ungmennum í Sydney árið 2008.Nordicphotos/Getty
Í júlí árið 2008 baðst páfinn afsökunar á barnaníðum af hendi kaþólskra presta. Páfinn talaði frammi fyrir hópi af biskupum á degi til heiðurs kaþólskum ungmennum í Sydney í Ástralíu.

Páfinn talaði um „skömmina sem við höfum allir fundið fyrir" og talaði fyrir því að sökudólgarnir ættu að svara til saka.

6. Ráðist á páfann
Skjáskot af sjónvarpsútsendingu frá Péturskirkjunni þar sem konan stökk á páfann.Nordicphotos/AFP
Á aðfangadagskvöld árið 2009 varð Benedikt páfi fyrir árás í Péturskirkjunni í Róm. Páfinn féll til jarðar eftir að kona hljóp hann niður. Öryggisverðir náðu til konunnar og könnuðust við hana. Töldu þeir að hún hefði reynt að grípa í páfann ári fyrr.

Páfinn lét atvikið ekki slá sig útaf laginu og þjónaði fyrir altari í Péturskirkjunni. Atvikið varð þó til þess að öryggisgæsla í Vatíkaninu var endurskoðuð.

7. Írsk afsökun
Nordicphotos/AFP
Eftir áframhaldandi fréttir af barnaníði af hendi presta innan kaþólsku kirkjunnar ritaði Benedikt páfi bréf þar sem hann viðurkenndi tilvist brotanna og bað þá afsökunar„sem hafa þjást skelfilega".

Í bréfinu var minnst á þá „skömm og eftirsjá sem allir kaþólskir menn finna fyrir" og að þeir seku yrðu að útskýra gjörðir sínar frammi fyrir guði.

Afsökunarbeiðninni var misvel tekið af fórnarlömbum sem höfðu óskað eftir að viðurkennt yrði að kerfisbundið hefði verið hylmt yfir gjörðir kaþólskra presta.

8. Halló Bretland
Benedikt páfi ásamt Elísabetu Englandsdrottningu.Nordicphotos/AFP
Eftir 28 ára bið urðu Bretar þess heiðurs aðnjótandi að fá páfann í heimsókn í september 2010. Um 125 þúsund manns söfnuðust saman á götum Edinborgar í Skotlandi þar sem sögu kristninnar í Skotlandi var fagnað. 65 þúsund manns mættu í messu í Bellahouston-almenningsgarðinum í Glasgow, öllu færri en 1982 þegar 250 þúsund manns mættu í messu hjá Jóhannesi Páli páfa á sama stað.

9. Félagslyndi páfinnÞað vakti töluverða athygli þegar Benedikt páfi kynnti Twitter-aðgang sinn. Aðgangur hans á samfélagsmiðlinum er @pontifex en fjölmiðlaráðgjafi páfans sagði Twitter góða leið til þess að „ná til allra". Aðgangurinn er aðgengilegur á átta tungumálum.

10. Afsögn páfaMánudaginn 11. febrúar sagði Benedikt páfi af sér. Sagði hann að uppsögnin myndi taka gildi áður en febrúarmánuður væri úti. Í yfirlýsingu sagði Benedikt:

„Eftir að hafa ítrekað skoðað samvisku mína gagnvart Guði, hef ég sannfærst um að styrkur minn, vegna hás aldurs, sé ekki nógu mikill til þess að sinna verkum Páfans."

Umfjöllun BBC má sjá hér.


Tengdar fréttir

Nýr páfi valinn fyrir páska

Búist er við því að nýr páfi verði kjörinn fyrir páska. Þessar upplýsingar hefur BBC fréttastofan frá Vatíkaninu. Eins og fram kom í fréttum fyrr í dag hefur Benedikt sextándi tilkynnt að hann muni segja af sér, en hann ætlar að hætta í lok febrúar. Páskadagur er síðasti dagurinn í mars.

Benedikt sextándi segir af sér

Benedikt sextándi páfi ætlar að segja af sér embætti. Ítalskir fjölmiðlar greina frá þessu í dag. Hann ætlar að hætta þann 28. febrúar næstkomandi.

Strangar reglur um val á páfa

Þegar Benedikt páfi lætur af störfum þann 28. febrúar þarf að huga að því að velja nýjan leiðtoga fyrir 1,2 milljarða kaþólikka um heim allan.




Fleiri fréttir

Sjá meira


×