Nýr páfi valinn fyrir páska

Búist er við því að nýr páfi verði kjörinn fyrir páska. Þessar upplýsingar hefur BBC fréttastofan frá Vatíkaninu. Eins og fram kom í fréttum fyrr í dag hefur Benedikt sextándi tilkynnt að hann muni segja af sér, en hann ætlar að hætta í lok febrúar. Páskadagur er síðasti dagurinn í mars.

Tilkynning páfans í dag kom fólki í opna skjöldu enda er þetta í fyrsta sinn í sex hundruð ár sem páfi segir af sér.

Talsmaður Vatíkansins, faðir Federico Lombardi, segir að nánustu ráðgjafar páfans hafi ekki vitað hvað hann hyggðist gera. Hann sagði að þessi ákvörðun páfans bæri vott um hugrekki og stefnufestu. Mario Monti, forsætisráðherra Ítalíu, sagði að sér væri brugðið við þessar óvæntu fréttir.

Bróðir páfans sagði við fjölmiðla að hann hefði fengið þær ráðleggingar frá læknum að hann ætti ekki að ferðast meira að neinu ráði. hann hefði verið að íhuga þá ákvörðun að segja af sér í marga mánuði.

Benedikt, sextándi, er 85 ára gamall. Hann hefur gegnt embætti allt frá því að Jóhannes Páll páfi lést árið 2005.