Lögðu sér lík til munns í hungursneyð

Beinafundur við Jamestown í Virginíu í Bandaríkjunum er talinn sönnun þess að breskir landnemar neyddust til að leggja sér mannakjöt til munns í mikilli hungursneyð veturinn 1609 til 1610.

Fréttastofa BBC greinir frá því að vísindamenn við Smithsonian-safnið í Washington DC telji nær útilokað að för í beinagrind stúlkubarns séu tilkomin með öðrum hætti en þeim þegar lík er hlutað í sundur og kjöt þess fjarlægt.

Vísindamennirnir telja að stúlkan hafi brauðfætt hungraða landnema í Jamestown í mikilli hungursneyð sem þar var í heilan vetur, en tugir, jafnvel hundruð manna, létust þá úr hungri. Ekki er þó vitað hvernig dauða stúlkunnar bar að en bein hennar fundust við fornleifauppgröft á staðnum í fyrra. Sannað er hins vegar að stúlkan var frá Bretlandseyjum.

Veturinn sem um ræðir, frá 1609 til 1610, er alræmdur í bandarískri sögu. Oft er vitnað til hans sem hluta eins versta tíma í landnámssögu Norður-Ameríku. Heimildir greina frá því að glorsoltið fólkið neytti hesta, hunda, katta, rottna og snáka áður en gripið var til örþrifaráða til að komast af. Lengi hefur því verið haldið fram að íbúar Jamestown hafi lagt í mannát, en hversu víðtæk þessi iðja var er ósannað. -