Gylfi: Allir vilja vinna Manchester United

Gylfi Þór Sigurðsson segir að leikmenn Tottenham vilji bæta fyrir tapið skelfilega gegn Manchester City um síðustu helgi er liðið mætir hinu Manchester-liðinu á sunnudag.

City fór illa með Tottenham um síðustu helgi og vann, 6-0. Gylfi segir að leikmenn og þjálfarar hafi rætt lengi um leikinn.

„En nú er þetta bara fortíðin. Liðið verður að bregðast við á réttan hátt og ég er viss um að við mætum í leikinn gegn Manchester United með réttu hugarfari,“ sagði Gylfi við enska fjölmiðla í dag.

„Við unnum þá á Old Trafford í fyrra og gerðum jafntefli við þá á heimavelli. Það er jákvætt fyrir okkur en Manchester United er lið sem allir vilja vinna.“

„Markmið okkar er að vera eitt af fjórum efstu liðum deildarinnar og við erum nú fjórum stigum frá fjórða sætinu. Við höfum ekki áhyggjur af þessu enn sem komið er. Við þurfum að sækja til sigurs á sunnudag, skapa færi og skora mörk.“