Sömu réttindi fyrir alla maka bandarískra hermanna

Samkynja makar bandarískra hermanna munu bráðlega njóta sömu félagslegra réttinda og makar af gagnstæðu kyni. Það eina sem þarf er gilt hjúskaparvottorð. Ákvörðunin kemur í kjölfar úrskurðar hæstaréttar í júní um að afnema DOMA-lögin svokölluðu, en þau skilgreindu hjónaband sem hjúskaparsáttmála karls og konu.

Breytingin tekur gildi þann 3. september og framvísi manneskja í herþjónustu gildu hjúskaparvottorði mun maki hans eiga rétt á sjúkratryggingu og húsaleigubótum líkt og makar af gagnstæðu kyni hafa lengi gert innan hersins. Chuck Hagel varnarmálaráðherra segir það nú vera stefnu Bandaríkjahers að allir makar hermanna njóti sömu réttinda, en það á ekki við um ógift pör.

Talið er að um 18 þúsund manns í hernum séu í sambandi með manneskju af sama kyni en ekki er vitað hversu margir þeirra eru giftir