Þjóðernissinnar ætla að "frelsa Evrópu frá skrímslinu í Brussel“

Þjóðernissinnuðu stjórnmálamennirnir Marine Le Pen og Geert Wilders hafa myndað bandalag fyrir kosningar til Evrópuþingsins sem fram fara á næsta ári.

Le Pen leiðir frönsku Þjóðfylkinguna og Wilders Frelsisflokkinn í Hollandi. Bæði eru þau umdeild fyrir stefnu sína í málefnum innflytjenda og segja þau stjórnmálaelítuna hafa verið of umburðarlynda í garð íslamstrúar.

„Tími sundrungar í þjóðernishreyfingum er á enda,“ sagði Le Pen á blaðamannafundi í gær þar sem samstarfið var tilkynnt, en hún hefur verið þingmaður Evrópuþingsins frá árinu 2004. Hún sagði daginn í gær sögulegan. „Í dag hefst frelsun Evrópu frá skrímslinu í Brussel,“ sagði Wilders við sama tilefni.