Ólögleg sala á líffærum blómstrar

Ástandið í Sýrlandi er sagt skelfilegt. Æ fleiri flóttamenn selja úr sér líffærin í þeirri von að lifa hörmungarnar af. Ungur maður að nafni Raid er einn þeirra. Fyrir sjö mánuðum flúði hann sýrlensku borgina Aleppo ásamt foreldrum sínum og sex systkinum.

Fjölskyldan fór til Beirút, höfuðborgar Líbanons, en fljótlega voru peningarnir á þrotum og þá var gripið til örþrifaráða. Hinn nítján ára Raid ákvað að selja annað nýra sitt á ólöglegum markaði en sá markaður hefur stækkað ört líkt og bilið á milli ríkra og fátækra í landinu.

Þúsundir ríkra araba koma hvaðanæva að til þess að nýta sér sjúkrahúsþjónustuna í Líbanon. Luc Noel, hjá Alþjóðaheilbrigðisstofnuninni í Genf, segir að yfirvöld í Líbanon fylgist hins vegar ekkert með því hvaða aðgerðir séu gerðar á sjúkrahúsunum, sjúklingar gætu allt eins farið heim með líffæri frá ólöglega markaðnum.

Áður en stríðið í Sýrlandi braust út voru það meira og minna fátækir Palestínumenn sem seldu líffæri sín. Nú hafa sýrlensku flóttamennirnir bæst í hópinn og fyrir vikið hefur verðið á líffærunum fallið í verði. Nú er staðan orðin þannig að mun fleiri reyna að selja en kaupa líffæri.

Talið er að um 5000 til 10.000 nýru séu seld ólöglega í heiminum á hverju ári. Þar sem Raid reykti ekki og var hraustur og heilbrigður átti hann ekki í neinum vandræðum með að selja nýrað. Læknar skrökvuðu að honum og sögðu líkur á því að nýrað myndi vaxa að nýju án allra aukaverkana.

Raid fékk greidda 7000 dollara fyrir nýrað, en sú upphæð svarar til um 865.000 íslenskra króna. Hann segir að sú upphæð dugi fjölskyldunni til framfærslu í vetur en veit ekki hvað þau gera þegar peningana þrýtur.

Nánar má lesa um málið á Der Spiegel.