Mandela enn í lífshættu

Stjórnvöld í Suður-Afríku segja ekkert hæft í vangaveltum um að Nelson Mandela sé í dauðadái. Dómskjöl þess efnis, sem birtust í fjölmiðlum nú í vikunni, vísa til ástands hans eins og það var fimmtudaginn 27. júní.

Bæði Jacob Zuma, forseti Suður-Afríku, og Denis Goldberg, náinn vinur Mandela, hafa heimsótt hann á sjúkrahúsið í Pretoríu síðan þá og segja hann hafa náð sér töluvert á strik. Hann hafi verið með meðvitund og sýnt viðbrögð.

Um tíma hafi læknar talið rétt að slökkva á tækjabúnaði sem heldur honum á lífi en ákveðið hafi verið að gera það ekki.

„Það eru engin merki um almenna líffærabilun og þess vegna mæla þeir ekki með því að taka vélina úr sambandi því það eru allar líkur á því að heilsa hans muni skána,“ hafði Goldberg eftir Graca Mandela, eiginkonu Nelsons.

Mandela er engu að síður þungt haldinn og talinn í lífshættu, þótt ástand hans sé sagt vera stöðugt.

Dómsskjölin voru birt í tengslum við dómsúrskurð í deilu fjölskyldu Mandela um jarðneskar leifar þriggja barna hans, sem nú hafa verið grafin á ný í þorpinu Qunu, þar sem Mandela ólst upp. Einn sonarsona hans, Mandla Mandela, hafði grafið beinin upp fyrir tveimur árum og flutt þau annað.

Desmund Tutu, fyrrverandi erkibiskup í Suður-Afríku og samstarfsmaður Mandela í baráttunni gegn aðskilnaðarstefnunni, sagði þessa fjölskyldudeilu ekki sæmandi og bað fólk um að láta allar illdeilur vera.

„Þetta er næstum því eins og að hrækja í andlitið á Mandela,“ sagði Tutu í gær. „Þjáning ykkar núna er þjáning þjóðarinnar, og alls heimsins. Við viljum faðma ykkur að okkur, styðja ykkur og láta ást okkar á Mandela skína í gegnum ykkur. Megum við vinsamlegast láta það eiga sig að flekka nafn hans.“